Ҫӗрпӳре лавкка вӑррисене ӑнсӑртран тытса чарнӑ. Ҫӗнӗ ҫул каҫхине ҫул-йӗр инспекторӗсем ҫул урлӑ правилӑсене пӑсса каҫакан икӗ арҫынна асӑрханӑ. Ҫитменнине, вӗсем ӳсӗр пулнӑ.
Хайхи арҫынсем - Шупашкартан тата Ҫӗнӗ Шупашкартан. Вӗсен кутамккинче апат-ҫимӗҫ, эрех пулнӑ.
Каярахпа ҫакна палӑртнӑ: 20-ри тата 34 ҫулти арҫынсем апат-ҫимӗҫе Ҫӗрпӳри супермаркетран вӑрланӑ. Пӗтӗмпе - 2 пин тенке яхӑн.
Ҫак арҫынсем Шупашкарти лавккасенчен те вӑрланӑ тесе шухӑшлаҫҫӗ. Вӗсен тӗлӗшпе пуҫиле ӗҫ пуҫарнӑ.
Чӑваш Енре Ҫӗнӗ ҫул каҫхине пӗр ача кӑна ҫуралнӑ. Кун пирки Хулари 1-мӗш клиника пульници пӗлтерет.
Пепке ҫур ҫӗр иртни 1 сехетре кун ҫути курнӑ. Вӑл - арҫын ача, ҫӳлерех асӑннӑ пульницӑра ҫуралнӑ.
Ача 4 килограма яхӑн тайнӑ, 56 сантиметр тӑршшӗ пулнӑ. Кӑҫалхи иккӗмӗш ача Ҫӗнӗ Шупашкарта ирхи 9 сехет те 34 минутра ҫуралнӑ. Вӑл та арҫын ача.
Кӑҫал пӗрремӗш хӗрача 13 сехет те 57 минутра Президент пепкелӗх центрӗнче кун ҫути курнӑ.
Роспотребнадзор пӗлтернӗ тӑрӑх, раштавӑн 19-25-мӗшӗсенче республикӑра ОРВИпе чирлекенсем сахалланнӑ. Ҫав тапхӑрта 11700 ҫын чирленӗ. Ун умӗнхи эрнепе танлаштарсан, ку 13,8 процент сахалрах. Чӳк уйӑхӗн пуҫламӑшӗнченпе чирлекенсен йышӗ чакса пыни пулман.
Чирлекенсем ытларах Шупашкарта, Канашра, Шупашкар районӗнче, Ҫӗнӗ Шупашкарта, Улатӑрта, Ҫӗмӗрлере, Ҫӗрпӳ районӗнче.
Сӑмах май, кӑҫал чирлекенсен йышӗ чи йышли кӑрлачӑн 31-мӗшӗнчен пуҫласа нарӑсӑн 6-мӗшӗччен пулнӑ — 21 530 ҫын.
Ҫӗнӗ Шупашкарта пурӑнакан арҫын кӳршине кӳрентерсе пӗтернӗ. Хӑй ҫамрӑк та мар, 57 ҫулта. Ҫамрӑк чух ҫын хӗрӳ-ха, ҫулсем кайнӑҫемӗн этем тени лӑпланакан, ӑсланакан.
Ҫӗнӗ Шупашкарти арҫын тӗлӗшпе ҫыхӑннӑ пӑтӑрмах суда, унтан суд приставӗсем патне ҫитнӗ. Приставсем ӑна кӳршинчен каҫару ыйтма хушнӑ.
Арҫын каҫару ыйтса ҫырнӑ хута Пӗлтерӳ хӑми ҫине вырнаҫтарнӑ. Унсӑр пуҫне вӑл ҫынна кӑмӑл-сипет тӗлӗшӗнчен сиен кӳнӗшӗн 15 пин тенкӗ тӳленӗ.
22.12.2022. Ҫак пилӗк "иккӗллӗ" кун республикӑра 38 ҫемье чӑмӑртаннӑ. Чи ҫамрӑк хӗр 21 ҫулта пулнӑ, чи асли - 51 ҫулта. Чи аслӑ каччӑ 62-ре пулнӑ. Ытларахӑшӗ, хӗрсем, 20-ре мӑшӑрланнӑ. Чи ҫамрӑк каччӑ 21 ҫулта пулнӑ.
Шупашкарти Мускав районӗнчи тата Ҫӗнӗ Шупашкарти ЗАГС пайӗнче ытларах ҫемье ҫавӑрнӑ. Иккӗшӗнче те ҫичшер мӑшӑр хут уйӑрттарнӑ.
Ҫӗнӗ Шупашкарта пурӑнакан 41 ҫулти арҫын 11 ҫул хӗрӗшӗн алимент тӳлемен, пулӑшман. Парӑм 557 пин тенкӗ пухӑннӑ. Ӑна административлӑ майпа та, уголовлӑ майпа та явап тыттарнӑ.
Арҫыннӑн хваттер сутма тӑрсан алимента тӳлемех тивнӗ. Ҫӗнӗ Шупашарта унӑн хваттерте 1/4 пай чухлӗ харпӑрлӑх пур-мӗн. Анчах парӑм пуррипе вӑл ӑна сутайман. Кун хыҫҫӑн ун часах алимента татма укҫа тупӑннӑ.
Ҫӗнӗ Шупашкарти пӗр шкулта хими класӗ уҫасшӑн. Ӑна 2023 ҫулхи авӑн уйӑхӗн 1-мӗшӗнчен йӗркелесе ярасшӑн.
Кунашкал класра ачасем хими предметне тарӑннӑн вӗренӗҫ. Педагог ятарлӑ квалификациллӗ пулӗ.
Хими класне ачасем конкурс витӗр тухсан кӑна лекме пултарӗҫ. Унта вӗреннӗ ача техникума кӗме, виҫӗ ҫултан квалификациллӗ должноҫ илме пултараҫҫӗ.
Малтанлӑха палӑртнӑ тӑрӑх, 5-6-мӗш классен хими предмечӗпе база пӗлӗвӗ пулӗ.
Чӑваш Енри виҫӗ хула Пӗтӗм Раҫҫейри конкурсра ҫӗнтерсе гранта тивӗҫнӗ. Ку укҫапа вӗсем хулана хӑтлӑх кӗртӗҫ.
Пӗтӗмпе 276,8 миллион тенкӗ тивӗҫнӗ. Ку укҫапа Ҫӗнӗ Шупашкарта Тӗкӗрҫ ращине хӑтлӑлатӗҫ. Ҫӗмӗрлере пионер организацийӗ пуҫланса кайнӑранпа 50 ҫул ҫитнине халалланӑ парка илемлетӗҫ. Улатӑрта вара грант укҫипе хулан истори пӗлтерӗшлӗ пайне хӑтлӑх кӳрӗҫ.
Ҫӗнӗ Шупашкар - 106 миллион тенкӗ, Улатӑр - 80,8 миллион тенкӗ, Ҫӗмӗрле 90 миллион тенкӗ выляса илнӗ.
Халӑх пултарулӑхӗн «Фестивальсен фестивалӗ - 2022» республикӑри конкурс ҫӗнтерӳҫисене палӑртнӑ.
Пӗрремӗш степеньлӗ лауреат ятне Йӗпреҫ районӗнчи Культура аталанӑвӗн центрӗ, Вӑрнар районӗнчи Тӗп клуб тытӑмӗ тивӗҫнӗ.
Шупашкар районӗнчи Тӗп клуб тытӑмӗ тата Сӗнтӗрвӑрри районӗнчи тӗп клуб тытӑмӗ — иккӗмӗш степеньлӗ лауреатсем.
Виҫҫӗмӗш степеньлӗ лауреат ятне Элӗк районӗнчи Тӗп клуб тытӑмне, Канаш муниципалитет округӗн Тӗп клуб тытӑмне тата Ҫӗнӗ Шупашкарти «Химик» культура керменне парас тенӗ.
Паян Чӑваш Ене 12 васкавлӑ медпулӑшу машини ҫитнӗ. Уҫҫисене савӑнӑҫлӑ лару-тӑрура панӑ.
5 «ГАЗель Next» и 7 «Соболь-Бизнес» автомобильсем ял тӑрӑхӗсенче тата пӗчӗк хуласенче ӗҫлӗҫ. Вӗсене Етӗрнене, Канаша, Патӑрьеле, Ҫӗрпӳне, Ҫӗнӗ Шупашкара тата Шупашкара ярӗҫ.
Машинӑсене Раҫҫей правительствин хушӑвӗпе килӗшӳллӗн туяннӑ. Кашнин ҫинче реанимаци, интенсивлӑ терапи валли хатӗр-хӗтӗр пур.
+27.3 °C